Al scür da l’America o al viag da la Maria – 6.a puntata

Una storia in sei puntate. Scritte in bregagliotto da Silvia Corfu.

Uramai issa la Maria l’à väa avdü lan muntagna, l’oceano, la tera fertile da la California, al deserto e al Grand Canyon. Tüt da colp l‘à santì üna gran stancleza e l‘à decis d’indär e ciäsa ma, l‘era anca e Las Vegas! Al bus al partiva torna da nöc e incura ca l’é indicia e la staziun la cità l’à scumanzäva e’s dasdär. Dal dì as avdäa doma l’ambulanza e poret ca girävan e tör sü butiglian vöida par guadagnär vargot. La dona c’ai à vandü al bigliet Las Vegas-Albuquerque ent al New Messico l’à väa ent üna gran crusc ent da col e la paräa ϋna monga. Issa, l’à panzaa, ie à avdü ün po’ da tüt! Al viag ent al scür al düräva torna 14 uran.

E Albuquerque l’era torna dì e intant ca l’à spaciäva al treno da l’Amtrak, al Southwest Chief cal va da Los Angeles e Chicago, l’é passaa qualcian dona Navajo ca la vandäan uracin e culaninan cun perlinan da calur. Ent al treno tüt l’era torna bel e quiet, al personale gentile e i altar viagiatur cuntent d’indär indua ca i väan d’indär.

E issa as avdäa er lan gran prateria indua ca üna volta al pasculäva doma i bisonti. As avdäa pochi besc. As väa l’impresiun d’ün gran pais vöid: quelan prateria ca van dal Messico fin in Canadà! Difati üna doneta Amish in viag cul se om e üna mügia da fanc tüt da colp l’à dic: “Guck mal, an lonely kuh”. I ciaculävan ent al se tudeisc veil e lee la däva e ment senza propi capir tüt quel c’as quintävan sü. Ma incura cal treno l’é torna passaa sün t’ün punt sura al Mississippi, tüc ca ian fac üna corza par avdeir e lan fian Amish la sgarivan dal güst. Pü bel al punt dal Mississippi che la televisiun ca prubabilment nu väan mia e ciäsa.

Dalonc, dalonc indua ca l’era pena indac giò al sul as avdäa lan muntagna Rocciose. Cun quela visiun ent al cor la Maria l’à saraa i öil ent al scür da l’America.

Leggi la 1.a puntata.
Leggi la 2.a puntata.
Leggi la 3.a puntata.
Leggi la 4.a puntata.
Leggi la 5.a puntata.
Leggi la 6.a puntata.