Al scür da l’America o al viag da la Maria – 4.a puntata

Silvia Corfu propone una storia a puntate, scritta in bregagliotto. Ogni mercoledì, fino al 22 marzo.

Le dumenga la Maria l‘à töc al bus da la cumpagnia Greyhound par al viag da 12 uran da San Francisco e Los Angeles. À s’é santäda giò da la banda drecia inscia da essar sagüra d’avdeir al Pacific. Ma già ca l‘era dumenga al bus l‘é giü dalunga plen e as avdäa ca nu l‘era plü la gent cun rapan ca l’à väa inscuntraa sül treno ma gent plü semplice e magari er poar. Ent lög tanco Salinas e King City l’é giü ün gran muiment da gent scüra da pel e cun cavei neir.

Laurant messicani ca ingiävan e truär parent o ca i turnävan e ciäsa dopo üna visita ei parent. Tüc c’ai fagiäan grangi sorrisi; lee cui se cavei neir ca plan planin i eran drè e gnir grisc l’à vess pudü essar üna nona messicana ca la turnäva da üna visita ei parent da King City! Lan farmäda la vessan giü d’essar da 10 minüt ma l’eran pütost sempar da 20 par ca la gent l’à pudess fümer e fär üna ciaculäda. E ent ogni staziun as avdäa ün sceriffo in uniforma cun maneta e pistola ent la cinta!

E ecco c’as à scumanzaa e avdeir i camp da tera scüra pront par essar plantaa torna, camp da rosenkohl e artischoke ca sciünävan plü, camp cun früt ross ca vessan pudü essar camp da fräga. Apunto ca issa as po’ crumpär frägan er da nuembar e la Migros e la Coop! Ün po’ dopo as avdäa mot da vignan. Ai é gni in ment c’al vin da la California l’era propi bun e l‘é giüda tüta cuntenta da veir avdü ün tochet da quela bela tera fertile. Dopo tüc quii bii camp ecco al spetacul dal Pacific tra Santa Maria e Santa Barbara. La gran bala dal sul l’ingiäva giò ent l’oceano e as avdäa tanta gent santäda giò sül sablun da la spiaggia ca cuntempläva al tramonto e, tanci giuan ca fagiäan surfing ent quelan gran onda blaveta, rosa, gialda e arancia.

Uramai l’era scür ün’altra volta incura cal bus l’é rivaa e Hollywood. L’à gurdaa ora dal balcun dal bus par avdeir s’as avdäa al gran scric “Hollywood” ma nu’s’avdü nagot. La staziun dal bus l’era scüra e sporca, nagot dal lüstar da quela cità. Inscia er e Los Angeles, l’ültima tapa da quel viag, la staziun l’à spϋzäva e l‘era plena da gent curiusa. Intorn e la staziun nu’s avdäa gnanca ün cafè gni ün utelet par la nöc parciè ca e Los Angeles al Greyhound as ferma ent ün brütissim lög industriale e abandunaa da la gent! Dopo pochi pass ent al scür  l’é turnäda indrè e l’à crumpaa ün bigliet par ϋn altar bus c‘al partiva la seira tard par Las Vegas. Stavolta i cumpagn da viag i eran giuan senza rapan, prostitutan e drugaa. Lee l’à pasaa la nöc ent al se cantunin senza sarär i öil. La si taschina cui rapan e la carta da credit al l’à tagnida  strecia, strecia sϋl scoss e l’à guardaa lan steila sur al deserto fin ca ent al scür l’avdü tüt da da colp e spuntär tanco ün fong lan luce viulenta da Las Vegas.

La quarta puntata mercoledì 15 marzo.

Leggi la 1.a puntata.
Leggi la 2.a puntata.
Leggi la 3.a puntata.
Leggi la 4.a puntata.
Leggi la 5.a puntata.
Leggi la 6.a puntata.