Al scür da l’America o al viag da la Maria – 2.a puntata

Silvia Corfu propone una storia a puntate, scritta in bregagliotto. Ogni mercoledì, fino al 22 marzo.

Al treno american, l’Amtrak, l’é comad e inscia cun ün lec e dispusiziun as drom propi ben.
E lan set da la duman, dopo la prüma nöc ent al treno, l’era già bel clair e, e la staziun da Denver al däva ün bel sul. Al treno l’era ün ura trop preist e inscia as à pudü gnir ora e fär ün giret par lan sträda e respirär l‘aria freisca da quela cità e plü da 1000 m sur‘ al livel dal mär! Ma e lan öc as partiva torna e l’era ura da fär culaziun ent al vagun risturant. Inscia al vegn fac lan prüma cagnuscenza: gent ca ingiäva e truär parent, gent ca turnäva e ciäsa dopo visitan e parent da l’est, omun granc e gross ca i väan la pasciun par al treno e ca forza i väan mudelin da treni ent lan si stϋa!

Doi oman e la meisa da la Maria i s’an guardaa e ian scumanzaa e quintär sϋ dal temp ca i väan passaa “la ent”. Lee l’à capì dalunga ca i eran doi ex-suldaa da la guera dal Vietnam. Innura, senza ufendar nagiün, par al disnär à se santäda giò cun üna doneta ca nu l’à väa mia tanta vöia da ciaculär ma, mear inscia. Incura ca la Maria l’à dic ca Denver ai väa plasciü propi tant par la bun’aria e par al sul, la doneta l’à dic ca ent al stato dal Colorado al sul al däva 300 dì e l’ann!

Quel dì là al treno l’à continuaa ent e ora da valädan strecia, ent e ora da galerian scüra e, ent ün lög l’altoparlante l’anunciaa ca in quela val strecia dal „Upper Colorado River“ as pudäa passär doma cul treno o cul cayak. Ai era mia ün’altra sträda! I crep da quelan muntagna i eran d’ün calur brϋn, quasi aranc ent al sul da nuembar. E Glenwood al treno a s’é farmaa parciè ca la vusc da l’altoparlante l’à comunicaa ca Glenwood l’era ün bel lög par indär cui schii. As avdäa qualcian villa e pisctan da schii ma er brϋtan ciäseta ca nu stävan quasi plϋ in pé. Mia propi ün Samurezzi!

Pazzia pö ca incura c‘al treno l’é passaa al cunfini tra’l stato dal Colorado e l’Utha al gniva scϋr ün‘ altra volta e Salt Lake City c’al fϋs giü ent al se programma, as l‘à mia avdϋ. Ma dal balcunin dal treno as avdäa neiv o sel? La doneta ent al vagun risturant l’à pö dic ca sa l’era ent lan muntagna, l’era neiv, sa l’era Salt Lake City, l’era sel.

L’era torna clair incura cal sul le gni sü ent al deserto dal Nevada e, dalonc dalonc as avdäa lan muntagna da la Sierra Nevada. Ma in generale, dopo Reno, al paesaggio l’era mia propi  ün gran che: ciäsetan pre-fabricäda, balcun rot e senza tendan, auti rügnent ent i ort, cagnac veil e sec e gnanca ün’anima viva sü lan sträda.

Leggi la 1.a puntata.
Leggi la 2.a puntata.
Leggi la 3.a puntata.
Leggi la 4.a puntata.
Leggi la 5.a puntata.
Leggi la 6.a puntata.