22 d’agost 2016

Inciö i fanc da la Bargaia i àn scumanzaa ün ann növ da scola. Lan vacanza l’en sciünäda e forza l’é al mument da guardär indree sün quist’astät ca purtrop la và vers la fin.

La duman al sul al riva ent la nossa ciäsadalfögh 1 ura e 20 pü tard che al 21 da giügn e incura ca ie fac al disnär i se raggi i rivan sül plan cromaa ca ‘i riflet, e inscìa, incura ca ie tai gió la salata ie à quasi da trär la tenda…
E panzär ca pö d’invern nu ‘m specia altar che ca la luce la torna ent dii noss balcun!

I cuntadin i en ben in avant cun sagär al rasdiv. Quista satmana lan previsgiun dal temp l’en buna e ie ‘i augur da pudeir fär anca ün bel pass inavant e rivär da metar ent ün bun rasdiv par i se besc.

Ent l’ort, ca quist’ann am à giü da bagnär pocan volta, parcié ca dal ceil am à sempar ciapaa aua ebonda (bun fac, issa ca ‘s toca e la pagär!), l’é crasciüda ben l’erba cativa, ma era al rest
(or che lan risc-gialda), l’à dac buni früt.

Nualtri am à mia giü da tör gió lan alzua (ügheta par quii da Sotporta), parcié ca i passar ch’i vivan sot lan plota dal noss tec – par essar sempar daspaira incura ca ‘m dà al gran e lan galina -, is àn mangaa davent già lan flur ent al meis da mag. Inscìa par quista volta la cunserva l’é già bela e facia! L’ann ca vegn am varà da tagnir in ment da metar sü dalunga üna reit, pena ca i alzuair i fluriscian.
Inciö l’en crodäda lan prüma brügna, i flox i en già quasi passaa e preist as zararann er i settembrini, ca cun i astar i en lan ültima flur da la stagiun!

Sa ‘m vess da vivar tüt l’ann da quel ca ‘m cultiva e am met davent par l’invern, am ingess mia tant dalonc, ma par furtüna ai é er lan butega e pö, laurär dadora ent l’aria fresca, cultivand la tera as adatand el temp meteorologich, al dà tanta sudisfaziun e al ragala energia e l’anima e er el corp.

Renata Giovanoli-Semadeni