Al cervel da l’om e al cervel da la dona

Traduziun da la Renata Giovanoli-Semadeni.

Ie à avdü ün video umoristich, ma ent al listess temp interessant, e ca ‘l cuntegn certan verità, d’ün cabaretist american ca spiega la diferenza trantar al cervel da l’om e quel da la dona e am é gnii l’idea da metar lan si spiegaziun in bargaiot par ca ci ca leg possa fär üna riüda:

Al cabaretist al stà in pé dadree üna testa cun al cranio evert in modo ca ‘s veza al cervel.
L’é al cranio d’ün om e al disc ca l’é fac da tantan scatla: üna par l’auto, üna par i rapan, üna par al laureri, üna par la dona, üna par i fanc… e quistan scatla l’as tocan mia ent!
Sa l’om l’à da dascütar vargot, al zära (brisc) soma quela scatla e al dascüt soma da quel ca l’é ent là.
E la fin al sära la scatla e al guarda ben da mia tocär ent lan altra.

Intant al cabaretist al camina, seri e cun gran rispet, vers la testa da la dona, er quela senza “cuertal”. Prüma che scumanzär la descriziun, as fa al segn da la crusc…
E pö al disc ca ‘l cervel da la dona l’é üna bala da fil ca tegnan tüt culegaa, tanco la superautosträda da l’Internet. Al bel, al disc lü, l’é ca ‘l tüt l’é pilotaa da ün’energia ca ‘s clama emuziun: zzzzzzzz…. zzzzzzz…
Quisto l’é ün dii mutiv ca fann scì ca lan dona la tegnan in ment tüt!

Ei oman quista roba ai interessa mia.
Inveci par lan dona tüt l’é important!

I oman, sagond lü, i àn üna scatla vöida (la si preferida) ca lan dona l’àn mia.
Sagond lü, l’é par quel, ca i rivan da fär roba tanco indär e pascär…, parcié ca là, as à mia da panzär… e malgrado quist, i oman i rivan da cuntinuär e fladär!…

Lan dona la rivan mia dal fär: la cuntinuan e panzär… zzzzz… zzzzz…
… E la capiscian mia la scatla vöida.
… E nagot ai fa pü fastidi che avdeir ün om ca fa nagot!

Traduziun da la Renata Giovanoli-Semadeni

PS. Scüsa Luigi, ie sà ca tü e lan parsuna dal te temp u gessas cirvel.