Al catalog dal Jelmoli

Di Silvia Corfu.

Dal ’50 e ‘60 la gent da Caltϋra la cumandäva anca i pagn dal catalog dal Jelmoli. Lan calceta e la roba sota as lan pudeiva crumpär enta Visavran o pür da la cramra ca la passäva du volta l’an.

Lan scarpa as l’an purtäva al Lilio calgair cun l’auto: as veiva doma dai telefunär ent par ai dir c’um veiva dasbögn da scarpan. Però mia tüc i veivan al telefun e inura as ingiäva ent par la Blanda e telefunär.
Ie era sempar un po’ invidiusa incura ca i’avdeiva ca lan mi amiga la veivan ent vna rasa o calcian növa dal Jelmoli. Mi mama l’era ün po’ e la veila e as fagèa trär ent i rafüdi da lan cusgina o pür la tuleiva e man la si machina da cusir.

Doma da guivna um a pö scumanzaa e sfoiär al catalog dal Jelmoli mia par taiär ora lan figüra ma par as cumandär pagn. Ma incura ca’l Renzo al purtäva la scatla riväda da Zurigo, la mama o al bap o tüci doi i geivan: “Cos’el sta roba?”
Al catalog veil al sciünäva ent al comat o pür la mama as al däva da taiär ora. Da pit um pasäva uran e uran a taiär ora lan figüra dal catalog veil e, cu la papa da farina ca l’era la cola da mi mama, um lan tacäva sül cartun e pö um lan taiäva ora ün altra volta par fär famiglian da bap, mama e fancin da cartun.
Ie nu sa mia sa quelan storia ca’s santiva ent al pais l’eran vera ma al pär c’üna volta üna giuvna da Caltüra la vèa dasbögn d’ün vasti par indär e üna nozza. Al la fac gnir svelt, svelt dal Jelmoli, al la trac ent quel di da la nozza e la fac er üna bela figüra ma, dopo la nozza, la mes al vasti ent la scatla e al l’à mandaa indree.

Ün altra volta qualci giuvnet ca gnivan un po’ stüf d’invern i en indac ent a Barnöv cul catalog dal Jelmoli e i an dic e ün omet dal pais ca l’era mia maridaa ca’l ves propi da veir üna dona. I an zaraa al catalog e ai an dic da cernar üna bela dona bionda e mia tropa grassa. E lü tüt cuntent la mussà ei giuvnet quela ca‘i plasgeiva al da plü.
Qualcian sadmana dopo i giuvnet i en turnaa ent a Barnöv par avdeir sa l’omet al veiva ciapaa la si dona. Ün po’ parpless al povret la raspus ca’i era rivaa doma ün scussäl blavet.

Riceta par la cola da Caltϋra: farina e aua.