Scrivar e machina

Incura ca ie era pita, ent al birò da me bap ai era üna machina da scrivar veila, grisgia e granda cun grangi tast radond ca ‘s vèa da scüciar gió ben fiss.


Ognitant ie pudäva provär e tipär ün mument, ma da spess i me dent i rastävan incagnaa intrantar i tast.
Pü tard i àn töc üna machina pü moderna, verdeta, già ün zich eletrica, ca pena ca ‘s tocäva i tast, la reagiva e inura ie nu à pü pudü provär…
Cun la machina, me bap e l’Erica i scriveivan lan letra, ognitant i matävan sot üna carta ca copia e sa i fageivan ün sbaglio il curageivan cun ün tippex.
Riväda ora Coira ent la scola da comercio ie vèa ün grand rispet da quelan machina ca ‘s trageiva sü vultand al plat dal banch: ie vèa tema da rumpar vargot. Parò lan mi cumpagna da classa, santäda gió e drecia e sneistra e dadree da ie, la ‘i dävan ent da güst, picand sünt i tast e scrivand riga dopo riga…
Inscìa ie à panzaa: “A basta, ie provarà. Tant quista l’é üna da quelan roba ca ent la mi vita ie nu fagiarà mai plü!”
E la bargaiota l’as é messa dree e copiär pustap dopo pustap, riga dopo riga.

La sanda da lan 9 e lan 10 l’era l’ultim’ura da la sadmana e l’era scrivar e machina. Sa ie vess sciünaa 10 minüt prüma, ie füss riväda da tör al treno da lan 10 e ie vess pudü essar 1 ura prüma e Visavran. Dagià ca al rincresciment da la mi ciäsa e dal me pais l’era propi grand, ie à töc tüt al me curagi ent i man e ie à dumandaa el maestar sa ie pudess mia indär 10 minüt prüma. L’à dic ca scì, e inscìa ie ingiäva sempar prüma che lan mi cumpagna. U pudé ben panzär indua ca i me panzeir i eran, già mezz’ura prüma… Inütil dir ca ie nu sun mai giüda forta ent quisto ramo!

E issa ai é i computer. As ai an à vulü, par ca la Renata la scumenza el drovär. “Parcié pö,” ie geiva, “sa ie poss scrivar e man?”
Ün bel dì ie à scumanzaa, e issa ie nu riv pü da ‘n fär e meno. O cun cossa panzav ca ie sèa dree e scrivar!?
Ormai la mi caligrafia l’é mia pü tant bela; ie scriv qualci pustap e pö ie tir ün strich, al pär ca ie sèa dree e stenografär. Par quel l’é mear sa ie scriv cul computer, inscìa ca er i altar i rivan da legiar!
E pö as pò curegiar, cumpletär e modificär i scric senza goma, senza tippex e senza cambiär föi. L’é ün bel passatemp e ie sper ca quii ca legian quel ca ie scriv, i vegnan mia stüf.

Renata Giovanoli-Semadeni