La giöbia dreemesdì

Di Silvia Corfu.

Isa ca ie sun veila am pläsc e fär calceta e ognitant er e cusir. Ma incura c’am ingiäva e la scola reale e la Stampa e um veiva mano lavori la giöbia dreemesdì, nu‘m plasceiva propi nagot.

Prüma da tüt parce ca i mac da quel temp nu veivan mianca mano lavori. Lur la giöbia dreemesdì i fageivan ginastica o geometria e, ie che s’era mia tant par fär calceta am gniva ϋna gran futa. Santäda giò ent al banc cun i man c’am sügevan e lan anza ca tacävan sü la schegna i’avdeiva ora dal balcun i mac e corar. Al pareiva chi fagesan eposta e pasär indua ca nualtri um ai avdeiva. Sa nu i eran in gir e corar, al vuleiva dir ca i eran dre e fär geometria.

Sagond, lan ura da mano lavori l’eran lunga: da l’üna e lan cinch. Difati incura ca um gniva ora da mano lavori d’invern lera già scürin. Daspes um sera talmente frusträda ca evant d’indär e ciäsa um as bacatäva. Ie vez bel anca inciö quelan  tasca da stofa cun lan schegna ca ciütevan ora, colpi indre e in avant, am as ves är pudü sficär ora i öil!

Um s’era mia propi tantan ca udiävan i mano lavori e er la pora maestra. Qualcian fia l’eran propi brava e sa ie e mi sor um riväva mai da scüner la nosa roba in temp par l’espusiziun da la fin da l’an, leir la veivan ϋna culeziun da pullover, calcetan, guanc e sciarpan. L’eran är brava cu la machina da cusir: rasan, blusan, scussäl, sac par la blancaria, mantin, tuaian ricamäda e anca daplü.

Ma incura ca ie à scumanzaa e laurer süla posta un dì al me chef à m’à dumandaa: “ Silvia bist du sicher, dass du die Sekundar Schule gemacht hast?” Ie nu s’era mia buna da fär quint e ie à dac ün po la colpa e tüt quelan ura da mano lavori da lan fia. Lan ura da geometria di mac l’am vessan forsi servì ün zic da plü.