Storieta

Ie vöi provär e scrivar gió üna storieta ca ie à santii pochi dì fa el radio rumanc.

Üna ditta americana l’à scric ora ün post. As en anunciäda circa 20 parsuna. Incura ca l’en giüda davant el respunsabal dal personale, quel ai à dic: “Al laureri l’é svariaa, al düra da lan 8 e lan 12 ura el dì, ogni tant fin 24 ura, 7 dì e la satmana, 365 dì e l’ann”.

“As al almeno qualci dì da vacanza?”, l’à vulü saveir ün dii intarassaa.
“No”, l’à raspus l’altar, “brich vacanza e da Nadäl, da lan Festa da Pasqua e ent lan satmana da vacanza da scola al carich dal laureri l’aumenta”.

Quelan parsuna ca ‘s eran intarassäda l’as en guardäda cunfusa e demoralizzäda fin ca ün giuan curagius l’à dumandaa: “Ai el sün quisto mond varün dispost e fär ün laureri simil?”

“Scì”, l’é giü la rasposta, “tanci miliardi da parsuna sü la nossa tera la fann ün laureri e quistan cundiziun dì par dì: LAN MAMA”.