La scola l’é sciünäda

La scola l’é sciünäda; issa l’é temp da vacanza. Sparem ca ei bargaiot dal dì d’inciö al suceda mia quel ca l’é sucess e quistan du giuvna da la puisia dal Luigi Giacometti!




Viag el mär

Du belan fia as en messa in viag,
üna da Caltüra e üna da Muntac,
üna cun tasca e l’altra cun valisc.
Riväda giol dazzi la guardia ai disc:
“Avete voi roba da dichiarare?
O avete con la Mafia da fare?”
Lan du fia e üna vusc l’àn raspus:
“No, nu ‘m à nagota. Gni spus, gni marus.”

Innur quel om al lan à facia passär
e lan mata l’àn töc la sträda dal mär.
Riväda gió Ricò l’àn ciarcaa ‘n utel
e an àn truaa ün, ma propi ün bel.
“Desiderano pasta o canelon?
Ostriche, vongole o gamberon?”
Al camerier ai à dumandaa riand.
Leir as en guardäda indecis’ intant.

“Um vess gügent sengal piat da furmantin”,
l’àn dic pö, fiss guardand al camarierin.
Quel l’à innura barbutaa: “Formagin??”
“Ma che formagin! Um à dic  f u r m a n t i n !”
E pö ‘s en messa e riar da slupär
(par nu vuleir dir “e riar da cr—-!”)
E la säla l’à scumanzaa e ‘s svöidär,
ca quel sfrignoz nu era da supurtär.

E la fin fin lan nossa du giuvneta
l’en ent la säla rastäda suleta.
Pö l’é rivaa al Signor Direttore.
L’à dic: “Andatevene, per favore!”
Lan fia as en facia gió lan larma
e ‘s en messa scarzand in viag vers Parma.
Sa nu l’en anca turnäda ent la Val,
sci innura l’en rastäda gió pal Stival…

Luigi Giacometti